يعد مجال الريزن حاليا من اعظم مجالات الهاند ميد في مصر والوطن العربي , ولكن هل سبق لك معرفة فنانين ومبدعين الريزن منهم المبتدئين ومنهم ايضا المحترفين , وفي هذا الموقع الذي يعد من اهم المواقع الخاصة بمجال الريزن وشغل الريزن , كان من الواجب علينا اظهار الجانب المضئ في عالم فن الريزن ومعرفة مبدعين شغل الريزن .
حوار مع الفنانة زينب سلامة
اهم المشاركات الفنية في مجال فن الريزن مع الفنانة زينب سلامة والحديث عن شغل الريزن
١- حدثنا عن نقطة الانطلاق ومشوارك قبل البداية وبعد البداية في مجال الريزن
السلام عليكم انا اسمى زينب سلامة بحب شغل الريزن جدا وكنت عايزة اتكلم عنه , لانه مجال فن جديد جميل جدا مجال الابتكاروالتجديد فيه كبير جدا كفايه انك الشكل
اللى بتتخيله بتقدر تنفذه زى ما تحب , نقطة الانطلاق بتاعتى فى فن الريزن كانت اشبه
بصعود درجات السلم انا تقريبا جربت فنون الهاندميد كلها.
يعنى بداية من شغل مفارش
الخرز لاكسسوار الخرز للشجر لعجينة السيراميك, واخيرا المدربة اللى كنت باخد معاها
كورس عجينة السيراميك اعلنت انها هتدى كورس ريزن , ما كنتش اعرف اى حاجة عن فن
الريزن وكان لسه مجال جديد قلت اجرب لانه عجبتنى افكاره, واخدت الكورس معاها على
النت وكنت منبهرة جدا بفن الريزن والقوالب والالوان حاجة كدة شبه السحر.
بعد الكورس
ابتديت ازود معلوماتى عن الريزن من خلال اليوتيوب طبعا فن الريزن كان لسه جديد, الفيديوهات كانت قليلة معظمها لأجانب بس الريزن فن بيشرح نفسه, يعنى ممكن تشوف
فيديو بلغة غريبة بس تفهم المضمون بعد ما عرفت معلومات كافية عن فن الريزن , واجهتنى
مشكلة ان الريزن لسه فن جديد وبالتالى ادواته غير متوفرة.
بس انا كنت خلاص قررت انى
لازم اجرب لانه فعلا مجال الريزن للشخص اللى بيحبه بيبقى حاجة كده شبه السحر, ما
تقدرش تبطله ابتديت ادور على خامات الريزن فى كل مكان جوه مصر وبره مصر لغاية ما
ابتديت, والحمدلله دلوقتى فن الريزن نوعا ما اصبح معروف وخاماته متوفرة.
٢- ما هو الهدف الذي تسعي اليه
بالنسبة للهدف اللى اتمنى احققه نفسى احقق حاجة متميزة براند كبير مميز اهم حاجة يكون مميز, بمعنى لما اى حد يشوف قطعة ريزن من شغلى يعرف انها من عندى من غير ما يشوف اسم الصفحة, باختصار نفسى يكون ليا بصمة فى عالم الريزن .
٣- اتكلم عن مجال الريزن في حياتك وتنصح المبتدئين ب ايه
مجال الريزن فى حياتى الريزن الصراحة مش مجال دراستى ولا شغلى انا متخرجة
من كلية العلوم, وبشتغل فى مجال التحاليل الطبية حاجة بعيدة خالص عن الريزن, بس برضه
ما اقدرش انكر ان دراستى افادتنى جدا فى مجال الريزن والايبوكسىي .
اقولكم ازاى من
خلال دراستى فى كلية العلوم اتعلمت ازاى اتعامل مع المواد الكيماوية بحرص وزى ما
كل طلبة العلوم عارفين شغل الكيميا لذيذ بس الغلط فيه كارثة, اتعلمت ازاى اخلط
المواد الكيميائية بالنسب المظبوطة اتعلمت قيمة الوقت بمعنى خمس دقايق تقليب
للريزن, يعنى خمس دقايق مش اربعة ولا ستة الريزن مادة كيميائية وخريجى كلية العلوم
بيبقى عندهم خبرة كبيرة فى التعامل مع المواد الكيمائية .
والصراحة دة ساعدنى كتير
اول ما بدأت شغل الريزن مش معنى كدة ان المبتدئين او خريجى الكليات التانية مش هيعرفوا يشتغلوا ريزن ,لا طبعا بس نصيحتى للمبتدئين يحاولوا الاول يعرفوا ازاى
يتعاملوا بحرص مع المواد الكيميائية, زى الريزن والايبوكسى علشان ما يحصلش اى ضرر
ليهم.
٤- ما رأيك في مجال الهاند ميد عموما وماذا ينقصه
رأيى فى مجال الهاندميد انه من أرقى المجالات على الاطلاق الانسان بيخرج
روح الفنان اللى جواه, بيعبر عن حاجات كتير مش بيقدر يعبر عنها بالكلام او التصرفات
بيخرج الانسان من حالات التوتر و الاكتئاب, بس للأسف ينقصه مزيد من التوعية باهمية
وقيمة منتج الهاندميد وكمية التعب والمجهود اللى بيبذلها الفنان لحد ما تخرج
القطعة بالشكل الجميل المطلوب.
٥- ما هي الاستعدادات التي تقوم بها وقت العمل في شغل الريزن
بالنسبة للاستعدادات وقت شغل الريزن الايبوكسى مادة كيميائية لازم نتعامل
معاها بحرص شديد , لازم احافظ على نفسى بأنى بلبس جوانتى وماسك مهما كان نوع الريزن
او الايبوكسى ولازم برضه احافظ على المكان اللى بشتغل فيه , بأني اغطى المكان كله
بالورق لان الايبوكسى لما بيتصلب بيلزق فى المكان اللى اتصلب فيه ومش بيطلع للاسف
.
٦- تحدث عن مجال الريزن باستفاضة وما رأيك فيه
مجال الريزن او الايبوكسى مجال اقل ما يقال عنه مجال ساحر فيه مساحة
كبيرة جدا للابداع , ممكن فى الاول نقلد شغل شفناه دة مش عيب لحد ما نوصل لمرحلة
الاتقان فى الشغل ونتغلب على اخطائنا , بعد كده نحاول نبطل تقليد ونخرج بره الصندوق
نشغل مخنا وننفذ افكار جديدة ومبتكرة كل فكرة جديدة بفكر فيها واقول لا مش ممكن مش
هتنفع , بعدين ارجع اقول وليه ما اجربش يمكن تنفع حاجات كتير بتنفع وتطلع جميلة
وحاجات اكتر بتبوظ وتترمى , بس مش مشكلة المهم ان احنا نجرب وكل حاجة بنجربها اكيد بنتعلم
منها .
المشكلة فى مجال الريزن او الايبوكسى انه مجال مكلف فعلا مادة الريزن او
الايبوكسى نفسها غالية, القوالب الالوان الاوراق المطبوعة الورود المجففة الخامات
كلها عموما مكلفه جدا , بالتالى الثمن النهائى للقطعة بيكون غالى بالنسبة للمستهلك
العادى بس غالبا فنانين الريزن معظمهم
بيشتغل علشان يشبع هوايته او لانه مسحور زى ما قلتلكم ومش قادر يبطل شغل ريزن .
٧- ما الحلم الذي يراودك ولم يتحقق بعد
بالنسبة للحلم نفسى ان شغل الريزن يتعرف اكتر واكتر وان الخامات بتاعته
تكون متوفرة بحيث اقدر انفذ كل الموديلات والآفكار اللى فى دماغى ويكون ليا براند
كبير واهم حاجة يكون متميز.
وجه رسالة لموقع Epoxy world وهل براند Epoxy world افادك في مجالك ولا لا
اجمل دعوة احب اوجهها لصاحب القناه ربنا يزيدك من علمه وفضله وربنا يساعدك دايما زى ما بتساعد اللى محتاج مساعدة, وباذن الله القناة بتاعتك تكون افضل قناة ريزن على مستوى العالم .
حوار مع الفنانة زينب سلامة من محافظة الاسكندرية
ويمكنك ايضا التواصل مع الفنانة زينب من خلال صفحة الفيس بوك الخاصة بها