مجال الهاند ميد في مصر يتنوع ويبتكر نوعا مختلفا ومتطورا من الصناعات اليدوية بما يسمي بالريزن , فلم يكتفي الفنانين والمبدعين في معظم مجالات الهاند ميد المختلفة علي تلك الصناعات فقط , بل اضافوا لها الكثير من التجديد والابداع وابتكار نوع خاص من صناعة الاكسسوارات , وتطرقوا الي صناعة الايبوكسي ريزن وهي المادة المستخدمة في صناعة اكسسوارات الريزن وغيرها من الاكسسوارات , فبدأ مشروع الريزن للمبتدئين ومعه بدأ حلم الفنانين في النهوض بما يقابل ويساوي هذا الابداع في مجال فن الريزن .
حوار مع الفنانة ياسمين جمعة :
ريزن اكسسوارات
١- حدثنا عن نقطة الانطلاق ومشوارك قبل البداية وبعد البداية في مجال الريزن
الاول انا مدرسة رياض اطفال مدرسة خصوصية حبيت فن الهاند ميد وبدأت حاجات كثير اوي بس اكثر حاجة شدتني هي ريزن , اول حاجة اطول فيها اوي كده بجد حبيت اوي خلط الوان الريزن ببعضها وانا بطلع منتج يعني كله بيشكر فيه وبيديك فيه طاقة ايجابية , فعلا مجال فن الريزن ده عالم تاني لوحده واكتر من مجرد هاند ميد .
٢- ما هو الهدف الذي تسعي اليه
الهدف اللي انا عايزة اوصله في مجال الريزن هو ان يكون ليا بصمة مؤثره في الشغل , وانا اللي اشوف شغلي يعرف ان ده شغل ايدي انا بالاضافة طبعا انا عايزة يكون ليا براند خاص بيا واني اكون معروفة في المجال .
اكسسوارات الريزن
٣- اتكلم عن مجال الريزن في حياتك وتنصح المبتدئين ب ايه
مجال الريزن في حياتي عبارة عن شاحن بيشحني طاقة ايجابية, الريزن بالنسبة ليا مش براند على قد ما هو فن فن بخرج فيه كل اللي جوايا بنصح اي احد جديد في المجال انه يشتغل بحب وميبصش لمقابل مادي خالص على الاقل اول سنة وكمان يبتدي بحاجات صغيرة كده اكسسوارات لان للاسف خامات الريزن غالية جدا وفي الاول لازم يحصل غلطات .
٤- ما رأيك في مجال الهاند ميد عموما وماذا ينقصه
بما اني اشتغلت حاجات كثيرهاند ميد وكانت بالنسبة ليا هواية مش شغل خاص بدخل ثابت ولكن للاسف الهاند ميد في مصر مش اي حد يقدره ولكن في ناس ما زالت بتحب الهاند ميد اللي رونقه الخاص .
ايبوكسي اكسسوارات
٥- ما هي الاستعدادات التي تقوم بها وقت العمل في شغل الريزن
اول حاجة لازم مكان مخصص للشغل لان طبعا احنا عارفين هو بيطلع منه غازات مينفعش يكون قريب من حد , او في اوضة نوم ثاني حاجة بجيب اي مفرش بلاستيك استخدام مره واحده بشتغل عليه وبجهز الماسك بتاعي ماسك الغازات وبجهز الكوبايات والجوانتي وخافض اللسان اللي بقلب به , وكمان بلاستر عشان انظف قوالب السيليكون من اي اتربة او بواقي ريزن و وكمان الميزان مهم جدا وبدأت اشتغل واقلب وببقى عاملة طبعا حسابي في الديزاين والكمية المستخدمة من الريزن .
٦- تحدث عن مجال الريزن باستفاضة وما رأيك فيه
مجال الريزن ممتع جدا ولازم اللي يدخل فيه يدخل بحب بدون انتظار مقابل مادي في البداية على الاقل , الريزن خاماته غاليه جدا عشان كده لازم نجيب في الاول على الاقل قوالب سيليكون صغيره نجرب فيه وهل هتستمتع فعلا بيه ولا لا علشان ما نلاقيش نفسنا بعد فتره عايزين نبيع الخامات اللي عندنا .
٧- ما الحلم الذي يراودك ولم يتحقق بعد
نفسي الاقي عملاء يقدروا قيمة القطعة اللي بعملها ونفسي كمان يكون ليا اسم بين فنانين المجال .
وجه رسالة لموقع Epoxy world وهل براند Epoxy world افادك في مجالك ولا لا
Epoxy World في بداية التعرف على الايبوكسي اتفرجت على فيديوهات كثيرعلى القناة واستفدت منها كثير طبعا ويا ريت كل فنانين المجال الكبار يعملوا زيه .
يمكنكم ايضا متابعة الفنانة ياسمين علي صفحة الفيس بوك الخاصة بها .